KABURI LA ELIMU KWA WATOTO MASKINI

KUPANDISHA viwango vya ufaulu bila uboreshaji wa elimu ni kuwazika watoto wa kimaskini ili waagane na elimu ili kesho waje kuwa wapambe na watumwa wa watoto wa viongozi wa sasa na wale wa matajiri.
Kabla hamjasimamia mipango yenu, hebu nanyi waleteni watoto wenu wasome na watoto wetu shule za umma (shule za kata).
Acha niwape kisa cha binti wa kijakazi aliyekuwa akiwania umalkia katika Taifa la Azania.
Katika Taifa la Azania alitokea mfalme ambaye maisha yake yote hadi anafika uzee hakubahatika kupata mtoto. Mfalme alitaka akiondoka duniani awe amempata mrithi wake ili aiche nchi salama.
Mfalme aliona awamu inayokuja iongozwe na mwanamke aweze kuwa malkia wa Azania. Mfalme alimwagiza msaidizi wake asimamie mchujo kisha mchujo nao ulimalizika kwa kuwapata mabinti wawili mmoja binti wa kiongozi na mfanyabiashara maarufu na wa pili akawa wa kijakazi, kwa hiyo lazima apatikane mmoja aweze kuwa malkia.
Mfalme akapanga siku ya zoezi la kumpata Malkia wa Azania na siku ilipowadia, mfalme aliwapatia zoezi dogo la kusaga mahindi apate unga wa ugali. Mfalme aliwaletea kiroba cha mahindi kila mmoja, akawatuma wakasage mahindi hayo wamletee unga kabla jua halijazama.
Binti wa kiongozi na mfanyabiashara maarufu alikwenda kwa wazazi wake na kuomba fedha za kusaga mahindi hayo kwa mashine na kufanikiwa kusaga na kuwahi kurudi kwa mfalme.
Mtoto wa kijakazi naye alimfuata mama yake kuomba ampatie fedha za kusaga mahindi hayo, mama yake alimpatia jiwe. Binti wa kijakazi alisaga mahindi hayo kwa taabu na nguvu kubwa kwa kutumia jiwe akapata unga na kuupeleka kwa mfalme.
Baada ya kufika kwa mfalme, aliwapokea na kuwapa chekecheo la kuchekecha unga huo kila mmoja akaanza kuchekecha. Binti wa kiongozi na mfanyabiashara maarufu alipata unga mwingi na chenga chache, yule wa kijakazi alipata chenga nyingi na unga mchache.
Ukweli ni kuwa binti wa kwanza alipata unga mwingi sababu alisaga kwa mashine na binti kijakazi alipata unga mchache kwa kuwa alitumia jiwe. Matokeo ya jumla mfalme alimtangaza binti wa kiongozi na mfanyabiashara kuwa Malkia wa Azania na binti wa kijakazi kwa juhudi kubwa aliambulia patupu.
Kisa hiki cha binti wa kijakazi nakifananisha na elimu ya Tanzania na matokeo haya ya kidato cha nne yanayoonesha watoto wetu wamefeli kwa takriban asilimia 70. Tujiulize tunawapeleka wapi hawa? .
Ushindani wowote ule unahitaji maandalizi ili uweze kushinda na ukiona baba au kocha wako anakupeleka kwenye mashindano makubwa yasiyoendana na maandalizi mazuri, ujue amepanga kukudhalilisha kama siyo kukudhalilisha ni kukuua kabisa.
Tujiulize kushindwa kwa binti kijakazi ni uzembe wake? Ujinga wa mama yake? au umaskini wao? Ila kwangu mimi kushindwa kwa binti wa kijakazi ni ujinga wa mfalme kutofikiria njia gani atumie ili zoezi litendeke kwa usawa.
Tuachane na hayo ya binti wa kijakazi na umalkia wa Azania, turudi hapa kwetu tuitazame elimu yetu ilipo na inapoelekea.
Serikali ya Awamu ya Tano imekuja na Waziri mpya Prof. Joyce Ndalichako.
Kama kawaida yetu, Watanzania tunawapima watendaji kwa majina na siyo mafanikio ya utendaji wao. Alipoingia tu akaanza kugombania suala la "Division" na "GPA" badala ya kuja na mpango mkakati wa kupandisha kiwango cha elimu kiweze kupanda juu na akashinda vita hiyo ya kurudisha "division" na kutupilia mbali "GPA" kwa kutumia mamlaka aliyonayo badala ya uhalisia.
Elimu ya nchi yetu imeshuka sana tena kwa kiwango cha juu, kuipandisha inahitaji muda.
Elimu bora inakuwepo pindi mambo yafuatayo yanapotekelezwa;
Mosi, Kuandaliwa Sera nzuri ya elimu inayotekelezeka.
Pili, Uandaaji mzuri wa walimu
Tatu, Kuwepo kwa zana za kujifunzia na ufundishaji kama vile vitabu vya kiada na ziada.
Nne, Mandhari nzuri ya kusomea na ufundishaji.
Hoja yangu ni juu ya upandishaji viwango vya ufaulu. Tumesikia Waziri wa Elimu Prof. Ndalichako ameturudisha katika mfumo wa madaraja, tafsiri nyepesi ni kuwa amepandisha viwango vya ufaulu.
Mtanishangaa sana kupinga kuwapima watoto wetu katika viwango vya juu, sababu ninazo na nitasimamia hata niwekewe kisu.
Viwango vya upimaji hupandishwa endapo elimu itazidi kuboreka. Dunia nzima inajua kuwa elimu yetu ipo chini. Wakati ni sasa tumwambie Mama Ndalichako aboreshe kwanza elimu iwe bora ndiyo apandishe viwango vya ufaulu.
Kuwapima watoto wa shule za S.t Kayumba na hao wenu wanaosoma shule za academia ni dhuluma ya wazi na matabaka haya mnayoyatengeneza majibu yake mtakuja kuyaona huko mbeleni.
Kisa cha binti wa kijakazi hakina tofauti na uamuzi wa Prof. Ndalichako wa kupandisha viwango vya ufaulu wa mitihani bila ya kuwa na maandalizi yeyote aliyoyafanya kuwasaidia watoto wa kimaskini.
Ndalichako wewe ni mtafiti mzuri tu, alichokifanya Prof. Mchome aliona kuwa elimu imeshuka kwa sababu ina upungufu mkubwa. Hivyo basi, ili watoto wa maskini wa Tanzania wasionewe na mfumo, aliamua kushusha viwango vya ufaulu ila siyo kwa kutangaza wazi ili watoto wa maskini hao wasionewe na mfumo.
Wazazi wa watoto maskini mnaosemesha watoto wenu shule za umma na ambao mlifurahia kuisikia kauli ya Ndalichako kurudisha madaraja, mfahamu wazi mlifurahia tanzia za elimu za watoto wenu na kuhalalisha kusonga mbele kwa watoto wao wanopata elimu bora ili kesho waje kuwa viongozi na kuwashinda watoto wenu kwenye soko la ajira.
Kuwapima sawa watoto wa shule za umma na wa shule binafsi ni kutaka kuwaita watoto wetu majina mabaya kuwa hawana akili, vilaza, wazembe, hawapendi elimu, hawana future na kashfa kibao, huku mnajua walimu wao hamuwalipi vizuri, wanawadai madeni yasiyolipika, walimu wao hawaandaliwi vizuri.
Wakati huohuo hamjawaletea zana za kujifunzia, mazingira yao kujifunzia hayaridhishi pia mmewatupia na jinamizi la lugha ya kufundishishia (Kiingereza) tusitegemee watafanya vizuri hawa.
Rai yangu kwa waziri husika boresha elimu kwanza kabla ya kupandisha viwango vya ufaulu. Namshauri pia afikirie upya upimaji wa wanafunzi ili kuleta usawa kutokana na elimu inayotolewa ili tupunguze mwanya uliopo sasa.
Inabidi mtafute suluhu juu ya lugha ya kufundishia na mfumo wa sasa ufumuliwe ili tujikite zaidi kwenye kutoa maarifa na siyo kuwakaririsha.
Hawa watoto robo tatu waliopata daraja la nne na sifuri tuwaweke katika uangalizi maalum, watafutiwe namna ya wao pia kuvuka hiki kizingiti. Ni wazi uwezo wao ni mzuri ila mazingira hayakuwaruhusu wapenye kwenye chujio lenu.
Pia mmemtaja shujaa wa shuleni zenu tunawaomba nasi mtutajie shujaa wa shule zetu za umma hata huyo wa kwenu akiitwa Ikulu na wa kwetu pia aitwe Ikulu kapambana kwa juhudi zake kuliko huyo wa kwenu aliyesoma kama mfalme.
Mwisho wabunge mfikirie kuweka sheria kwa viongozi wa serikali, wabunge na watumishi wa umma kusomesha watoto katika shule za umma labda ndiyo wataboresha elimu yetu, bila hivyo kilio hiki hakitaisha.
Taifa lenye madaraja tofauti ya elimu ni bomu linalongoja kulipuka.